परिवार बेसाहारा बनेपछि युवाको साथ : मृत निर्वाचन प्रहरीका परिवारलाई आर्थिक सहयोग

फागुन ५, बैतडी – बैतडीका मृत निर्वाचन प्रहरीको परिवारलाई युवाहरुले आर्थिक सहयोग हस्तान्तरण गरेका छन्।

गएको माघ २० गते निधन भएका प्रकाश चन्द का परिवारलाई “हाम्रो अभियान, सेवानै युवाहरुको पहिचान” नामक युवा समूहले संकलन गरेको रकम सोमबार हस्तान्तरण गरेको हो।

दशरथचन्द नगरपालिका–४ निवासी चन्दको मृत्युपछि उनका परिवार आर्थिक रूपमा बेसाहारा बनेका थिए। युवाहरुले सञ्चालन गरेको सहयोग अभियानबाट संकलित ३ लाख ३७ हजार ५ सय रुपैयाँ पीडित परिवारलाई हस्तान्तरण गरिएको युवा अभियन्ता दिनेश चन्द ले जानकारी दिनुभयो।

अभियानमार्फत संकलित रकम पूर्व वडा अध्यक्ष मोहन बहादुर चन्द मार्फत परिवारलाई हस्तान्तरण गरिएको बताइएको छ।

आर्थिक अवस्था कमजोर रहेका प्रकाश चन्द आफ्नो वृद्ध हजुरआमा, आमा, श्रीमती तथा दुई साना बालबालिकाको पालनपोषणका लागि निर्वाचन प्रहरीमा आवद्ध भएका थिए। तालिम सम्पन्न गरी घर फर्किने क्रममा लडेर उनको दुःखद निधन भएको थियो।

युवाहरुले कठिन परिस्थितिमा परेको परिवारलाई राहत स्वरूप सहयोग जुटाएको बताएका छन्।